ខេត្តកំពង់ស្ពឺ : នៅវេលាម៉ោង ២៤ : ០០នាទី រំលងអធ្រាត ឈានចូលថៃ្ងទី១៦ កក្កដា ២០២២ មានករណីគ្រោះថ្នាក់ចរាចរណ៍មួយបានកើតឡើងលើផ្លូវជាតិលេខ ៤ ចន្លោះគីឡូម៉ែត្រលេខ ១០៣-១០៤ ត្រង់ចំណុចភូមិទី ៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ បង្កឡើងដោយរថយន្ត ប្រភេទកុងទែន័រមួយគ្រឿង ម៉ាក FUSO ពណ៌ស ពាក់ស្លាកលេខភ្នំពេញ (3F-6196 សណ្ដោងសុឺមីរុឺម៉កពាក់ស្លាកលេខ ព្រះសីហនុ 4A-2011)
អ្នកបើកបរ មិនស្គាល់អត្តសញ្ញាណ(ចុះរត់គេច) រថយន្តបើកបរក្នុងទិសដៅពីកើតទៅលិចមកដល់ចំណុចខាងលើ ជួបឧបសគ្គរេចង្កូតបុកដើមឈើធ្លាក់ផ្លូវក្រឡាប់ទៅផ្នែកខាងស្តាំដៃផ្លូវជាតិ ។
ដើមហេតុ រថយន្តដាច់កាឡេមុខ បង្កឲរថ យន្ដបាត់ម្ចាស់ការលែងគ្រប់គ្រងបញ្ជាបាន តែសំណាងល្អមិនបង្កគ្រោះថ្នាក់ដល់អ្នកដំណេីរដទៃទៀត។
គ្រោះថ្នាក់នេះបណ្ដាលឱ្យខូចខាតរនាំងការពារផ្លូវប្រវែងប្រហែល ៥០ម៉ែត្របាក់ដើមឈើ ៤ ដើម រថយន្តរខូចខាតយ៉ាងដំណំ.
ហេតុការណ៍ នេះសមត្ថកិច្ចចរាចរណ៍កំពុងអន្ដរាគមន៍ ហៅរថយន្ដស្ទួច និងបន្ដស្រាវជ្រាវរកម្ចាស់ក្រុមហ៊ុន ដើម្បីយកមករក្សាទុកនៅអធិការដ្ឋាននគរបាលស្រុកភ្នំស្រួច ដើម្បីបន្តនីតិវិធី៕
